World Wide Web

O WWW (acronimo anglés de World Wide Web, Gran Tiraraina Mundial) u simplament web ye un rete de pachinas escritas en hipertexto por meyo d'o luengache de marcas HTML y connectatas entre ellas por meyo de vinclos, de traza que formen un solo cuerpo de conoiximiento por o que se i puet navegar fácilment. Ta acceder-ie ye indispensable un navegador web. Fue creyata por Tim Berners-Lee cuan treballaba en o CERN de Chinevra, Suiza. El mesmo diriche o W3C, l'organismo que s'encarga de mantener-ne en funcionamiento. O web se basa en tres estandars ta funcionar: o Uniform Resource Locator (URL), que s'encarga de dar una adreza unica ta localizar cada pachina; o Hyper Text Transfer Protocol (HTTP), que especifica la traza en que se ninviará y recibirá la información entre o navegador y o servidor; y o Hyper-Text Markup Language (HTML), un metodo ta especificar como s'ha de veyer ista información en o navegador. Acompanyan a l'HTML, o CSS, ta definir aspectos de disenyo, u o JavaScript ta fer chicotas programacions en a web. Tamién se fa servir muito actualment ta chuegos y webs con muitos efectos visuals, o Flash de Macromedia. En aragonés, cuan se parla de "web" en masculín se fa referencia a lo sistema web u bien a un puesto web, pero cuan se parla de "web" en femenín se fa referencia a nomás una d'as pachinas web d'o sistema.